Plantun de Prouvènço

Pèr coumpara dos planto d'encò nostre

Muscari botryoides & Picea abies

Barralet-pichot

Muscari botryoides

Asparagaceae Hyacinthaceae

Autre noum : Cebihoun.

Nom en français : Muscari faux botryde.

Descripcioun :
Lou barralet-pichot èi pas tant coumun que soun cousin, lou barralet, Muscari neglectum. Trachis dins li bos e prado umido de plano e en mountagno. Pèr lou destria, fau regarda li fueio un pau plato, emé lou bout en capouchoun e que soun pu courto que l'enflourejado e souvènt dreissado. Tambèn li flour soun quàsi tant larjo que loungo e lis enflourejado mens sarrado. Coumpara emé lou barralet que ié sèmblo proun.

Usanço :
Li cabosso se manjon cuecho en liéume. Èi poussible de tasta li jòuini fueio e li flour.

Port : Erbo
Taio : 5 à 30 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Muscari
Famiho : Asparagaceae
Famiho classico : Hyacinthaceae

Ordre : Asparagales

Coulour de la flour : Bluio
Petalo : 6
Ø (o loungour) flour : 0,4 à 0,8 cm
Flourido : Printems Ivèr

Sòu : Ca
Autour basso e auto : 0 à 2200 m
Aparado : Noun
Mars à jun

Liò : Prado umido - Blachiero - Melounié - Castagnaredo
Estànci : Mesoumediterran à Subaupen
Couroulougi : Éuroupenco
Ref. sc. : Muscari botryoides (L.) Mill., 1768

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.